Hvað er fátækt?

Hrímkristallar græðginnar hafa sest á hjörtu og heila sumra þegna þessa lands. Þeim mun verða kalt og mun kaldara en hinum, sem sluppu við þessa kristalla. Það er furðulegt að sumt fólk haldi að hamingja felist eingöngu í peningum. Sé þess vegna tilbúið að svíkja þjóð sína eins og hún leggur sig, fyrir peninga. Þetta sama fólk telur sér trú um að því beri miklu meira en öllum öðrum, af því það sé svo einstakt, klárt, vel gefið og fallegt. Þessu fólki dytti aldrei til hugar að deila með öðrum nema að græða á því. Bræðurnir í Kjötborg virðast eiga sér innihalds- og kærleiksríkt líf. Gjafmildi, greiðvikni, umhyggjusemi og nægan tíma fyrir alla, hafa þessir bræður. Viðskiptavinunum þykir vænt um þá. Í þættinum um þá kom fram fólk sem grét af gleði yfir að eiga þá að sem vini. Þeir bræður eru hreint örugglega ekki að raka saman fé á sinni verslun, en þeim líður vel. Dagarnir fullir af kærleika og þeir hafa fyrir sínum nauðþurftum. Ekta íslendingar eins og ég þekkti íslendinga fyrr á árum. Sé einhver í sárum og einn á báti, þá láta þeir bræður það sig skipta. Þeir hringja og spyrja hvort allt sé í lagi hjá viðkomandi og bjóða fram sína þjónustu, sé eitthvað að. Þeir eru sem sé þeir aðilar sem fylgjast með sínum nágrönnum. Ekki bæjaryfirvöld, nei það eru kaupmennirnir á horninu sem fylgjast með sínu fólki. Hrímuðu nýfrjálshyggjupostularnir og þeirra meðreiðarfólk, hafa öruggleg hauga af peningum einhvers staðar á eyjum og öðrum einangruðum stöðum á hnettinum, þar sem þau verða að lifa til æviloka, ef þau ætla að nota þá peninga. Þau eru alls staðar óvelkomin, vegna óheiðarleikans, sem þeim annað hvort er meðfæddur, eða áunninn í græðginni. Fá vestræn ríki hafa orðið varhluta af þeirra óbilgirni, sem þetta fólk hefur stjórnast af. Það er og verður því vinafátt í einangruninni og öllum er sama um þau. Þeirra viðskiptavinum þykir ekki par vænt um þá.  Svikarinn úr Tudor dæminu í svíþjóð og englandi, er enn í felum 10 árum eftir dóminn og hefst við að talið er í frumskógum Ástralíu! Glæsilegt líf, eða? Það dæmi var víst “bara” einn sænskur milljarður, eða bara dagsskiptimyntin hjá okkar stórkörlum. Ég er að slást við TM og einnig TR vegna bílslyss, sem ég lennti í fyrir þrem árum. Það gengur hvorki að fá TM til að greiða réttmætar bætur skv skýrslum, og ekki heldur TR að viðurkenna slysið sem vinnuslys, þótt ég hafi verið á leið til vinnu þann umrædda morgun! Hvorug stofnunin virðist ekki hafa rekstrarfé til að mæta þeim rekstri, sem þeim er úthlutaður og fá gígant greiðslur fyrir. Peningar TM hafa farið að því er virðist í hlutafjárkaup í öðrum fyrirtækjum eiganda fyrirtækisins! Nú síðast fékk ég hjartaáfall og er eftir það talinn 75 % öryrki, með gríðarlegan meðala- og læknakostnað. Hvaðan ég á að pína fram peninga fyrir þeim kostnaði, sem og öðrum fyrir framfærslu, virðist hvorugri þessari stofnun koma við. Engu líkara en að beðið sé eftir að ég drepist. Það mun þó ekki hjálpa, því ég ánafna afkomendum sóknarréttinn í málunum. Sorry TM og TR, þið græðið ekkert á að losna við mig. Hvorum aðilunum líður betur, Kjötborgarbræðrum eða Baugs- og stjórnmálaliðinu? Ég held að það vefjist ekki fyrir neinum. Þau eru mörg dæmin eins og mín og öll þurfa þau að koma í dagsljósið. Annars verður umræðan einungis um tölur og persónurnar og lífin gleymast. Harmleikirnir verða því hvorki til haga haldið né skrásettir.

Athugasemdir

[Hreggviður Davíðsson, 29.12.2008 kl. 21:18]

Veikindin eru yfirstíganleg Jóna, en kerfið er verra viðureignar. Það sem fólk fyrri ára hefur byggt upp með seiglu og ósérhlífni, hefur verið rifið niður á örfáum árum. Ein af höfuð-syndunum, hefur verið mærð sem dyggð í jafn mörg ár og niðurrifið hefur staðið yfir. Gangi þér vel frænka í baráttunni.