Frekjuhundar, sem reynast væsklar.

Hvað myndi ské ef ég færi í að stofna matvöruverslanir út um hvippin og hvappinn. Verslanir sem legðu lítið á vörurnar og væru í því að undirbjóða Bónus og Krónuna bara sýndarmennskunnar vegna? Jú, eigendur þeirra verslana gerðu allt til að tortíma mér á sem skemmstum tíma. Ofur einfalt.

Það sama gerist í útlöndum þegar menn ætla að hertaka gömul og gróin peningaveldi með kúrekahattinn og sprotana einum vopna. Þeir verða stoppaðir. Það ríkir visst jafnvægi og værukærð í lögmálum viðskiptanna, þú færð þetta og ég hitt, þannig hefur það verið í ára raðir í veröld peninganna. Til þess að komast þangað inn fyrir dyr, þarf annað og meira en skítuga skó og nýríkra frekju.  Þegar svo okkar ástkæru nýríku smástrákar rekast á fyrstu mótspyrnu í herförinni, þá hlaupa þeir buxnalausir og vælandi frá fjölmiðli í fjölmiðil. Rakka krónuna okkar í skítinn og haga sér eins og verstu ruddar gagnvart sínum fyrstu og bestu stuðningsaðilum, okkur íslendingum.

Þeir hafa verið uppvísir af að kaupa erlend fyrirtæki, búta þau niður og eyðileggja til að græða einhverja þúsundkalla! Gamalkunnug aðferð, sem hefur afar litla samúð í för með sér. Það liggur við að ég taki mér orð Steingríms moðgræns í munn og segi, fuck them. Heilt ótrúlegt að menn geri svona lagað, sem eru að velkjast í fjármálum dag út og dag inn. Áður en að annar gjaldmiðill verður arftaki krónunnar, þarf að halda utan um hana og vernda, þ.e.a.s. ef menn ætla að vernda land sitt  og verðmæti þess. Þessu endalausa hálfvitablaðri um krónuna, verður að linna. Ég vil bara ekki trúa því að siðblinda og frekja nokkurra fárra eigi að fá átölulaust, að tortíma allri baráttu fyrri kynslóða.

Gleymum ekki því að þessi svokölluðu fjárfestingafélög eru bara nokkur skrifborð hlaðin óskhyggjupeningum og án raunverulegra tengsla við hjartslátt þegnanna.

Hreggviður